1- الوحيد اللي يقدر يحيي شمسك من جديد، هو أنت.
2- أظن إن أول علامة على حبك لحد، أنك تفضل شغوف وأنت بتسمعه.
إحنا ممكن نتكلم مع أي حد بدافع شهوة الحكي جوه كل واحد فينا، وعلى حسب حالتنا النفسية وظروف المكان والزمان وما إلى ذلك.. لكن مش أي حد هنحب نديله وداننا بمحبة حقيقة. لا على سبيل الفضول ولا الواجب.
أنك تفضل شغوف وأنت بتسمعه، حتى لو بيحكيلك ذكرياته اللي أنت تقريبا حفظتها.
3- قبل ما تفتح وجع حد، اتأكد إنك هتعرف تقفله.
وده ينطبق على قعدات البنات وفضولهم وأسئلتهم الشخصية للي قدامهم من غير وجه حق وكده.
4- في حاجات كده ما تتقدرش ولا بكنوز الدنيا.
منها مثلا: حد يخاف عليك، حد يحميك، حد ينبهك لحاجة تخصك أو مثلا يلاقي حاجة لايقة عليك ويقول دي علشانك.
5-لما كنت في إسكندرية، ركبت الباص أبو دورين، السواق وقتها كان مشغل أغاني مبهجة.
كان فيه من الركاب أسرة غير مصرية، قام الراجل اللي معاهم يتحرك على النغمات، واحنا حواليه بنصقف، لغاية ما انتبه إن فيه موبايلات متسلطة عليه!
هنا، وقف حركة وقال بغضب: "لا تصوير، لا تصوير" وراح لكل اللي ماسكين الموبيلات، وطلب منهم يحذفوا اللي صوروه.
سيبوا الناس تتنفس.
6- قبل ما تقل بأصلك مع حد، افتكر إن مصر أوضة وصالة.
7- افردوا وشكم وأنتم رايحين الشغل، غيركم بيدور ولسه مش لاقي.
